Maalu Masokoka Mabuulula

Anu ku ntwadijilu menemene mu mudimu wa bwambi wa Mwaneetu Branham byakamweka bitooke tòò ne ndongolwelu wa cyena mangumba wakajuudiibwa mbwa kutwa malongolodi a ntendeleelu nyama ku mikolo, kabiyi bwa kutwa Evanjeeliyo mulelela nyama ku mikolo to. Mwaneetu Branham yêyè uvwa witabuuja Bible ku Mwaku ne ku Mwaku, ne kavwaku mwa kudya cibanga to, nansha byôbì ne bavwa mwa kumwipata kudi biinende, balunda, anyi beena dîkù dyende.

Pacivwaye cidimba cya Église Missionnaire Baptiste, bôbò kumwambila bwa kujidilaye bambi bakaji. Nansha nanku, yêyè uvwa mumanye Mifundu yônsò bîmpè menemene. 1 Timote 2.12 udi wamba anu patooke ne: “Kadi ncyêna nganyisha bwa mukaji kulongeshaye to, anyi bwa kwangataye bukookeshi kumutu kwa mulume, kadi bwa kwikalaye mupuwe,” ne 1 Kolinto 14.34 udi wamba ne: “Bakaji beenu biikale bapuwe mu ekeleeziya: bwalu kabyena byanyishiibwe bwa bôbò kwakula…” Eci kacivwa cintu cya cilwisha bakaji to, kadi Bible uvwa mwambe bwalu abu anu bu mùdìbu. Paakamwambilabo bwa yêyè kusungula, kavwa ne mushindu wa kudya cibanga to kadi wakapatuka mu ekeleeziya.

Kî ngawu Mufundu nkaayaawu uvwa mangumba awu mapange mapangilemu to. Mukalenge wakabuulwila Mwaneetu Branham bulelela pa dibatiiza dya mu mâyì. Mmunyi muvwa Yesu mwa kutuma dîyì ne: “Nanku ndaayi, nulongeshe bantu baa matunga ônsò, nubabatiize mu dînà dya Taatu, ne dya Mwânà, ne dya Nyuma Mwîmpè,” padi dibatiiza dyônsò didibo balonde mu Bible diikale mu Dînà dya Yesu? Mupostolo Peetelo wakatuma dîyì mu Byenzedi 2.38 bwa kunyingalala ne kubatiijiibwa mu Dînà dya Mukalenge Yesu Kilisto. Mifundu idi ikwata mudimu mu bwobumwe bupwangane, kadi bivwa bikengela muprofeta bwa kubuulula bwalu busokoka ebu ne: “Taatu” kî ndînà to, “Mwânà” kî ndînà to, ne “Nyuma Mwîmpè” kî ndînà to. Anu mudibi ne muntu umwepele udi taatu wa bânà, mwânà wa balume wa baledi bende, ne mwanaabo wa balume kudi bânà baabo baa tatwěndè ne mamwěndè, nansha nanku dînà dyende kadyena “taatu,” “mwânà,” anyi “mwaneetu” to. Taatu, Mwânà, ne Nyuma Mwîmpè mmyânzù bwa Dînà dya Yesu Kilisto. Maataayi 28.19 ne Byenzedi 2.38 byakalwa bilulamangane mu mushindu mupwangane.

Nansha mpekaatu wa ku cibangidilu mu Budimi bwa Edena wakabuuludiibwa, kaciyi bu ne ndidya dya cimuma kampanda to, kadi cintu kampanda citambe bubi. Mmunyi muvwa didya dya kapese kaa cimuma kampanda mwa kubuulwila Adama ne Eva ne bavwa butaka? Kacyena cyumvwika anu ciikale cya meeji to. Ndipetangana kaayi didi pankaci paa cimuma cya pomme ne butaka? Muprofeta wa Nzambi wakabuulula anu bitooke tòò bwalu busokoka ebu.

Banjelo badibo bambe mu Bwakabuulwibwa nshapita 2 ne 3 abu mbanganyi? Mênà abo’s adi mwa kuumvwika mamanyike bîmpè.

Babandi baa pa tubalu bàdì bàkèmeshà baa mu Bwakabuulwibwa nshapita 6 aba mbanganyi? Badi ne cintu cya mwomumwe ciikale cya mushinga wa bûngì.

Ditunga dya États-Unis mbaditeeleku mu Mukanda wa Bwakabuulwibwa anyi?

Bantu 144.000 baakasungidiibwa mu nshapita wa 7 aba mbanganyi?

Ndumba munene wa mu nshapita wa 17 ewu nganyi? Ngiikadilu wende ne maalu masokoka ônsò aa akabuuludiibwa mu Mukenji wa muprofeta wa bukole mutuma kudi Nzambi ewu.

Kî ng’anu bishima bûngì kabuyi kubala ke byakafila mulume ewu to, kadi maalu masokoka avwa mabuta mu Bible munda mwa bikondo byônsò akabuuludiibwa kabidi mu mudimu wende wa bwambi. Byakamweka bitooke tòò ne muprofeta ewu mmuuje Mifundu yàbûngì misakidila pa wa Maalaki 4.

Bwakabuulwibwa 10.7: Kadi mu matuku a dîyì dya mwanjelo wa mwandamutekete, paabangaye kwela mpungi, bwalu busokoka bwa Nzambi budi ne cya kujika, bu mwakambilaye basadidi bende baprofeta.

Dîyì didi munkaci mwa kwela lubila diikale dyambila baa pa buloba bwa kupatukabo mu mangumba ne kwalukila ku Dîyì dya ku cibangidilu dya Nzambi. Muntu ne muntu wa kutudi udi ne mpunga umweumwe awu wâkadibò nende kudi Peetelo, Yakobo, ne Yone. Twêtù tudi ne dyêsè dya kubadiibwa munkaci mwa basungula banyaabanya baa Nzambi badi kabayi bafwanyine kutwila malongolodi a ntendeleelu a dituku dya leelu ewu cinù to.

Mifundu ya Cijila idi ilonda maalu a nsòmbelu ne byenzedi bya bantu baakenda ne Nzambi ne baakalaabiibwa bikole ne Nyuma Wende mu mushindu wa ne baakamba EMU MMUDI MUKALENGE WAMBA, ne mêyì abo akashindikiibwa kudi bimanyinu ne maalu a kukema bivwa kabiyi mwa kupangila to. Bavwa baprofeta baa Nzambi, ne Dîyì dya Nzambi ditumina lukongo lwabo alu.

Bikondo mbishiilangane mpindyewu ne muvwabi musangu uvwa Yesu panwapa awu anyi? Balombodi baa ntendeleelu mbaakaMupoopela pa nkuruse. Bayiidi bavwa banyaabanya munkaci mwa ndongolwelu munenaanenaale wa ntendeleelu. Bôbò bavwa babiipata, babaseka, ne ndekeelu wa byônsò babashipa bwa dikandameena dyabo dya ndongolwelu wa cyena mangumba uvwabo biitaba kudi bantu bàbûngì. Twêtù tudi bafwanyine kubenga kushipiibwa bwa bitudi twitabuuja leelu ewu, kadi bulelela tudi tukengeshiibwa. Anu muvwa Bafaalesa ne Basadoka, kabeena mwa kubenga kwitaba bishima byakafila mudimu wa bwambi wa Mwaneetu Branham to mu mushindu wa ne badi banyeemena ku mishindu mikwabo ya ditulwisha naayi. Nudi mwa kuumvwa bamba ne yêyè uvwa muprofeta wa mashimi, mulombodi wa kasumbu kaa bantu bapambuke; anyi cintu cibi cipite aci. Mu bushuwa bwa bwalu, yêyè uvwa mulume wa Nzambi mudipwekeshe mwikale ukandameena ne bukole bwônsò bukontononyi bwa kashendende budi naabu mangumba ne tusumbu twa bantu bapambuke pa bantu baa Nzambi. Mushindu umweumwe awu ngwakalwishabo naawu Yesu paakakandameenaYe mêyì abo maswika ne bilele byabo.

Nzambi wakatwa mushinga budiswile bwa Mwaneetu Branham bwa kwitabuuja Dîyì dyônsò dya mu Bible, ne Yêyè udi munkaci mwa kukwata mudimu ne mudimu wende wa bwambi bwa kufikisha mìlìyô ya misuuka kudi Yesu Kilisto. Leelu ewu, Dîyì dya Mwanjelo wa Mwandamutekete didi munkaci mwa kwela lubila lukole anu mùtùDi dyeleele. Bantu batwe ku mìlìyô ibidi buloba bujima mbiitabuuje Mukenji wa Mwaneetu Branham. Eci cidi mwa kwikala anu bantu banyaabanya pa binunu bibidi bya mìlìyô bya badi badyamba ne mbeena Kilisto, kadi ndîbà kaayi dikaadiku bantu baa Nzambi kabayi banyaabanya?

Tudi ne mayiisha makwata pa mikaba ya mêyì mapite pa 1.200 miikale ne Dîyì dyakambabo mu ciprofeta mu Bwakabuulwibwa 10.7 ne nedilwe. Diyiisha ne diyiisha dya kudiwu didi dikangula maalu masokoka a Nzambi mapite. Diine Dîyì adi ndituule dipuwe pawikala muswe kuDiteeleja.

Dîbà nansha dimwe mêmè ewu ncitu ntwadilaku bantu mukenji bwa bandonde, anyi bashaale beena ekeleeziya wanyi, anyi bwa kubanga bulunda anyi bulongolodi kampanda to. Kacya ncituku mucyěnzè ne ncyakucyenzaku mpindyewu to. Aanyi meeji kaena ku bintu abi nansha, kadi aanyi meeji adi nangananga ku bintu bya Nzambi ne bantu, nenku mêmè mwa kukumbajaku cintu cimwe bidi mwa kunsankisha. Cintu cimwe ciine aci ncya kumona malanda malelela enzeka pankaci paa Nzambi ne bantu, mudi bantu balwa bifukiibwa bipyabipya mu Kilisto, bûle tente ne Nyuma Wende ne biikale ne nsòmbelu ulondangana ne Dîyì Dyende. Ndi njinga kunulomba ne kunusengeleela ne kunudimwija bônsò bwa kuumvwa dîyì Dyende dya mukana pa dîbà edi, ne kulambula nsòmbelu yenu yônsò nkòòng kudiYe, anu mudibi ne ndi ne dyeyemena mu mwoyi wanyi ne ndi mudifile mêmè yônsò kudiYe. Nzambi anubeneshe, ne dilwa Dyende disankisheku myoyi yenu.

Rév. William Marrion Branham