Mu Bible, Nzambi uvwa misangu yônsò utwadila bantu baa pa buloba Mukenji Wende mwikale upicila anu kudi muprofeta wa cikondo aci. Wakaakwila ne Môsà mu cipuka cilakuka kapya ne wakamutuma ne mudimu wa kuya kapatula beena Ebelu mu Ejipitu. Dikunji dya Kapya divwa dimweneka ne mêsù ne bimanyinu bikwabo byakafidiibwa bwa kushindika mudimu wende wa bwambi. Yone Mubatiiji wakatwala Mukenji mwikale ulongolola baa pa buloba bwa Maasiya uvwa ne cya kulwa. Pavwaye mwikale ubatiiza Mukalenge Yesu mu Musulu wa Yadene, Dîyì difumine mu Dyulu dyakashindika mudimu mutuma naawu Yone wa kuleeja Mwânà wa mukooko wa Nzambi ne: “Ewu m’Mwanaanyi munanga, udi uNsankisha bîmpè.” Paakapita bidimu, Dîyì dya Mukalenge e kumvwika cyakabidi diikale dyakula ne muprofeta paakaakulaYe ne Pôlò mu Bukênkè bwakamufofomija, ne paanyima dyakamutuma ne mudimu wa kuteekaye ekeleeziya mu bulongame. Kuumukila eku ne eku kwa Dipungila Dipyadipya ne Dikulukulu, kacya Nzambi katu mwanji kwakwilaku ne bantu Bende ku ndongolwelu wa cyena mangumba anyi bulongolodi kampanda bwa ntendeleelu nansha. Yêyè utu anu wakwila ne bantu ku muntu umwepele: muprofeta Wende. Nenku Yêyè uvwa ushindika baprofeta aba ku bimanyinu bitambe mfukilu.
Kadi twǎmbè bishi bwa leelu ewu? Nzambi ucitu ubuulwila baprofeta Dîyì Dyende anyi? Kucidi kabidi bimanyinu bitambe mfukilu anyi? Nzambi mmufwanyineku kutuma pa buloba muprofeta wa matuku a cyena leelu aa anyi? Dyandamuna ndya ditambe kutooka tòò ne: “Eyowa!”
Kadi netumanye munyi paajuuka muprofeta? Neikale mufwanangane ne cinyi? Neěnzè maalu mushindu kaayi? Neatupe cimanyinu kaayi? Neǔjè Mifundu kaayi?
Baprofeta baa kale bavwa bantu baa Nzambi baa bukitu, ne kabavwa ne bwôwà bwa kukandameena malongolodi a ntendeleelu to. Bwa kwamba menemene, bavwa misangu kana yônsò babamba mambavi kudi balombodi baa ekeleeziya. Eliya wakeela malongolodi a ntendeleelu a mu dituku dyende kadyombo, ubakonka ne Nzambi uvwaku mwa kuneemeka mulambu wabo bôbò, anyi wende yêyè. Kwelabo mbila. Kwambabo biprofeta. Kutupikabo biikale basambuka cyoshelu. Kuditapabo mputa ne twele. Kadi Nzambi kaakabumvwilaku to. Eliya kutangila mu Dyulu kwamba ne: “Bimanyike leelu ewu ne wêwè ngudi Nzambi mu Izaleela, ne mêmè ndi musadidi webe, ne ndi mwenze bintu byônsò ebi ku dîyì dyebe.” Pashiishe yêyè kulokesha kapya mu Dyulu bwa kwoshaku mulambu. Miika muprofeta wakakandameena Mfumu wa Izaleela, ne kasumbu kajima kaa baakwidi, paakadyulaye Mwakwidi Munene Zedekiya bwa ciprofeta cya mashimi cyakambaye. Mwakwidi Munene kumutapaye dipi mwîsù ne Mfumu kumwela mu buloko bwa bulelela bwakambaye. Nansha Mukalenge Yesu pende wakakinyiibwa kudi malongolodi a ntendeleelu a mu dituku Dyende mu mushindu wa ne baakaMupoopela pa nkuruse pamwe ne benzavi baa babyǎbàbyàlè. Piikala maalu malonda mwa kushaala anu malelela, muprofeta uvwa mwa kukinyiibwa kudi ndongolwelu wa cyena mangumba wa leelu ewu, ne bavwa mwa kumutwa mênà a mwabuludyanganyi, muprofeta wa mashimi, anyi mabi mapite awu. Kadi Nzambi uvwa mwa kwimana ku luseke lwa musadidi Wende.
Bu kwôkò mwa kwikala muprofeta mu matuku etu a cyena leelu aa, mmunyi muvwaye mwa kwitabiibwa kudi Ekeleeziya wa Katolike? Ekeleeziya wa ba-Baptistes? Ekeleeziya wa ba-Luthériens? Anyi dingumba kana dyônsò edi?
Mukalenge Yesu mmutume aba bônsò badi baMwitabuuje ne mudimu ewu ne: “Nenku bimanyinu ebi nebifile badi biitabuuja; Mu dînà dyanyi nebiipate badémons; nebaakule myakulu mipyamipya; Nebakwate nyoka ne byanza; ne bôbò banwe cintu cidi cishipangana, kacyakubenzela bwalu nansha; nebatentekele babeedi byanza, ne babeedi nebasangale.” (Maako 16.17-18). Mufundu ewu mmulelela leelu ewu anyi? Piikalawu kawuyi mulelela to, Mêyì a Mukalenge akajikila mudimu dîbà kaayi? Mu Bible mujima, baprofeta bavwa ne bukole bwa kwondopa babeedi, kwipata badémons, ne kwenza bishima. Môsà wakateeka nyoka wa cyamu cya kabanda kumpala kwa beena Izaleela bwa kubondopa ku lulengu lwa mênù a nyoka (Nomba 21.9). Naamana, mwena Suuliya wa bukole, wakalwa kudi Elisha bwa yêyè kwondopiibwa ku nsudi (2 Bakalenge 5.9). Paakakuluka nsongalume mukwabo ku dididiishi dya nzubu wa kuulu ne kufwaye, mupostolo Pôlò wakamujingila maboko ne wakaaluja mwoyi mu mubidi ukaavwa mufwe awu (Byenzedi 20.10). Tudi anu ne mulubu wa bidimu 3½ bya mwoyi wa Mukalenge Yesu, kadi mu biine bidimu bikese menemene abi, Yêyè uvwa anu wenda wondopa babeedi. Bampofo baakatabala. Beena nsudi bakondopiibwa. Bampudimaci baakumvwa. Balema baakendela kuulu. Disaama dya mushindu wônsò dyakondopiibwa. (Maat. 4.23)
Nzambi uvwa kabidi ushindika baprofeta bende mu mishindu mikwabo pa kuumusha dyondopa. Nansha maalu masokoka menemene mabuta mu mwoyi avwa amanyika kudi bôbò bantu baa Nzambi aba. Mfumu Nebukandeneesa wakaloota ciloota cyakamutacisha, kadi kayi mwa kuvuluka kabidi muvwaci to. Muprofeta Danyele kwawila Mfumu awu ciloota ciine aci ne kumwambilaye ne ciprofeta cyakalonda (Dan. 2.28). Kakuvwa civwa cisokome kudi Solomo to paakalwa Mukalenge mukaji wa ku Sheba kumpala kwende. Yêyè uvwa mûle tente ne Nyuma mu mushindu wa ne wakamwambila nkonko ivwaye naayi mu mwoyi wende kumpala mene kwa kumwelaye yǒyì (1 Bakalenge 10.3). Elisha wakambila Mfumu wa Izaleela byônsò bivwa Mfumu wa Suuliya mulongolole bwa kwenza, too ne mêyì mene avwaye udyambidila mu nzubu wende wa bulaalu (2 Bakalenge 6.12).
Ku byenzedi byende Yêyè mwine, Mukalenge Yesu uvwa misangu yàbûngì uleeja ne Nyuma wa dijingulula ewu utu n’Nyuma wa Kilisto. Wakajingulula ngiikadilu wa Natanaela paakambaYe ne: “Monaayi bushuwa mwena Izaleela, mwena munda mudi kamuyi budimu!” Nenku Yesu kutungunuka ne kwambila Natanaela mwaba uvwaye usanganyiibwa paakamwambila Filipo bwa Maasiya (Yone 1.48). Paakamona Natanaela ne Yesu uvwa mumanye mwoyi wende, wakajingulula dyakamwe ne Yêyè ke Kilisto. Musangu anu wa nzanzanza uvwa Yesu mumone Peetelo, Wakamwambila dînà dya tatwěndè, Yona (Yone 1.42). Peetelo ke kumba kulekela byônsò ne kubangaye kulonda Yesu matuku ende ônsò akashaala a mwoyi. Yesu wakatuutakeena ne mukaji wa beena Samaaleya ku ciinà cya mâyì ne wakamwambila bwa mpekaatu yende ikaavwaye mwenze. Mêyì ende a mbangilu avwa ne: “Mukalenge, ngaajingululu ne wêwè udi muprofeta” (Yone 4.19). Bantu bônsò basatu aba bavwa baa bipidi bya nsombelu bishiileshiilangane, cibì baakajingulula Yesu dyakamwe paakaleejaYe dipà dya dijingulula.
Dipà edi dyakajimina paakafundabo dibeji dya ndekeelu dya Bible anyi? Piikalabi ne bishima ebi mbifundiibwe bitooke too mu Bible, bidi penyi leelu ewu? Muprofeta wa dituku dya cyena leelu’s udi mwa kushindikiibwa ne bishima.
Nzambi wǎpù bantu Bende mwoyi anyi? Ucidi kabidi ne bukole bwa kwondopa babeedi anyi? Ucidi wakwila neetu ku baprofeta Bende anyi? Kuvwaku umwe wa ku baprofeta mudyanjile kumona dituku edi anyi?
Kudiku biprofeta bicidi ne cya kuula anyi?