Mbimweneke anu patooke ne, dibatiiza didi ne mushinga munene, kadi mushindu utudi babatiijiibwe udi ne bwalu anyi? Kudi dibatiiza dijaalame, anyi cyônsò ciikalaku aci neciikale anu mwa kukumbana anyi? Pa nanku pawikala witabuuja Bible, EYOWA, kudi dibatiiza dijaalame.
Ekeleeziya yàbûngì idi ibatiiza mu Dînà dya Taatu, Mwânà, ne Nyuma Mwîmpè, kadi edi kî ndidi dijaalame bilondeshile Bible to.
Mu Byenzedi 19, kuvwa bamwe bantu bakaavwa biitabuuje mu Yesu Kilisto, kadi kabayi banji kupeta Nyuma Mwîmpè mu myoyi yabo nansha. Mupostolo Pôlò uvwa mumanye mushindu mujaalame wa kupeta Nyuma Mwîmpè, pa nanku yêyè kubakonka ne: “Nenku nwâkabàtiijiibwa mu dibatiiza kaayi?” Ke bôbò kwamba ne: “Mu dibatiiza dya Yone.” (Byenzedi 19.3) Pôlò kumona ne kabavwa babatiijiibwe bilondeshile dîyì dituma dya Peetelo dya mu Byenzedi 2.38 to, pa nanku kubalongeshaye bwa kubatiijiibwa cyakabidi mu Dînà dya Mukalenge Yesu. Pa dîbà adi, anu muvwabi bilayiibwe, kupetabo Nyuma Mwîmpè.
Pa nanku, mbwa cinyi bayiidi bavwa babatiiza mu Dînà dya Yesu pavwa Yesu, Yêyè mwine, mubămbìle bwa kubatiiza mu Dînà (kaciyi “mênà” to) dya Taatu, ne dya Mwânà, ne dya Nyuma Mwîmpè? (Maat. 28.19) Bavwa benza cilema anyi? To! Bavwa benza menemene anu mwakalongeshiibwabo.
Paudi wenda ubala cyena bwalu eci, tuma meeji ku dyebe dînà. Wêwè udi mwânà anyi? “Mwânà,” ke dînà dyebe anyi? Udi maamu anyi? “Maamu,” ke dînà dyebe anyi? Mu bushuwa bwa bwalu kî nnanku to, abi mmyânzù patupu. Utu ne dînà dya cya bushuwa, nenku ke mudi Nzambi pende naadi.
Dyandamuna ndyedi:
Ne kakutu cintu mu Bible cya ne kukaadiku muntu mubatiijiibwe mu dînà dya Taatu, Mwânà, Nyuma Mwîmpè to; bwalu cintu bu nanku kacituku to. Taatu kî ndînà to; ne Mwânà kî ndînà to; ne Nyuma Mwîmpè kî ndînà to; kadi Dînà dya Taatu, Mwânà, Nyuma Mwîmpè m’Mukalenge Yesu Kilisto.
Yesu Kilisto ngudi Nzambi! Yêyè ngudi Taatu, Mwânà, ne Nyuma Mwîmpè.
Pawikala ukeba Nyuma Mwîmpè kadi mwikale udikonka bwa cinyi Mukalenge kî mmwanji kukupaye, nenku udi mufwanyine peebe kudyela lukonko lumwelumwe lwakeela Pôlò alu ne: “Nwâkabàtiijiibwa mu dibatiiza kaayi?”
Myaba ya kubala
Maataayi 28.19
Nanku ndaayi, nulongeshe bantu baa matunga ônsò, nubabatiize mu dînà dya Taatu, ne dya Mwânà, ne dya Nyuma Mwîmpè:
[Dînà dya Taatu nganyi? Dînà dya Mwânà? Dînà dya Nyuma Mwîmpè?]
Maako 16.16
Ewu udi witabuuja ne ubatiijiibwa neasungidiibwe; kadi ewu udi kayi witabuuja neapiishiibwe.
Yone 5.43
Ndi mulwe mu dînà dya Taatu wanyi, kadi nwênù kanwena nungakidila to: kadi paalwa mukwabo mu dînà dyende yêyè mwine, awu kaayi nenumwakidile.
[PadiYe ulwa mu Dînà dya Taatu Wende, mpindyewu Dînà Dyende nganyi?]
Yone 10.30
Mêmè ne Taatu wanyi tudi umwepele.
Yone 12.45
Nenku ewu udi ummona mêmè udi umona ewu udi muntume.
Yone 14.8-9
Filipo kumwambilaye ne: Mukalenge, tuleeje Taatu, nenku aci cidi citutwisha.
Yesu kumwambilaye ne: Kwônsò kûndì neenu eku, kadi wêwè kwêna anu mwanji kummanya to, Filipo? Ewu udi mummone mêmè mmumone Taatu; kadi mmunyi mûdì wamba ne: Tuleeje Taatu?
Yone 20.27-28
Pashiishe kwambilaye Tomase ne: Olola munu webe ùwělè emu, ne tangila byanza byanyi; ne olola cyanza cyebe ùcyělè emu, ucibweje bikole mu lubadi lwanyi: nenku kwikadi mwena bupidya to, kadi ewu udi witabuuja.
Ke Tomase kwandamuna kumwambila ne: Mukalenge wanyi ne Nzambi wanyi.
Byenzedi 2.38-39
Nenku Peetelo kubambilaye ne: Nyingalalaayi, ne nubatiijiibwe muntu ne muntu wa kunudi mu dînà dya Yesu Kilisto bwa dilekelediibwa dya mpekaatu, nenku nenupete kupà kwa Nyuma Mwîmpè.
Bwalu mulayi udi bwenu nwênù, ne bwa bânà beenu balela, ne bwa bônsò badi kule, mu bûngì bwônsò bwabiikila Mukalenge Nzambi wetu abu.
Byenzedi 4.12
Ne kakwena lupandu mu mûngà muntu nansha: bwalu kakwena dîngà dînà dipa bantu mwinshi mwa dyulu, mutudi ne cya kusungidiibwa.
Byenzedi 8.12
Kadi paakiitabuujabo Filipo uyiisha maalu avwa atangila bukalenge bwa Nzambi, ne dînà dya Yesu Kilisto, baakabatiijiibwa, bônsò ne balume ne bakaji.
Byenzedi 19.3-6
Nenku yêyè kubambila ne: “Nenku nwâkabàtiijiibwa mu dibatiiza kaayi? Ke bôbò kwamba ne: Mu dibatiiza dya Yone.
Nenku Pôlò kwambaye ne: Bulelela Yone wakabatiiza mu dibatiiza dya kanyinganyinga, mwikale wambila bantu ne, bavwa ne cya kwitabuuja ewu uvwa ne cya kulwa paanyima pende yêyè, mbwena kwamba ne, Kilisto Yesu.
Paakumvwabo cyôcì eci, baakabatiijiibwa mu dînà dya Mukalenge Yesu.
Nenku paakamana Pôlò kubatentekela byanza, Nyuma Mwîmpè wakabatuulukila; ne baakaakula mu myakulu, ne baakamba biprofeta.
Efeso 4.5
Mukalenge umwepele, diitabuuja dimwepele, dibatiiza dimwepele.
Kolosaayi 3.17
Nenku cyônsò cinudi nwenza mu dîyì anyi mu cyenzedi, enzaayi byônsò mu dînà dya Mukalenge Yesu, biikale nusakidila Nzambi ne Taatu kupicila ku yêyè.
I Yone 5.7
Bwalu kudi basatu badi bafila bujaadiki mu dyulu, Taatu, Dîyì, ne Nyuma Mwîmpè: ne basatu aba badi umwepele.