Edze ƒã bena, nyɔnyrɔ̃ le vevie ŋutɔ, ke ɖe alesie wonyrɔ̃ mí la wɔ nanea? Ɖe nyɔnyrɔ̃ nyuitɔa ɖe lia, alo ɖesiaɖe nyoa? Ne èxɔ Biblia dzi se la, Ekema Ɛ̃, nyɔnyrɔ̃ nyuitɔ li.
Hame geɖewo nyrɔ̃a ame ɖe Fofo la, Vi la, kple Gbɔgbɔ Kɔkɔe la ƒe Ŋkɔ me, gake esia mesɔ gbe le Biblia nu o.
Le Dɔwɔwɔwo 19 me la, amea ɖewo li si xɔ Yesu Kristo dzi se xoxo, gake womexɔ Gbɔgbɔ Kɔkɔe ɖe woƒe dzime haɖe o. Apostolo Paulo nya mɔnu nyuie tɔ si wotsɔ xɔna Gbɔgbɔ Kɔkɔe lae, eyata ebia wo bena, “Nuka dzi wonyrɔ̃ mi ɖo?” Eye wogblɔ bena, “Ɖe Yohanes ƒe nyɔnyrɔ̃ la dzie.” (Dɔwɔwɔwo 19:3) Paulo kpɔ bena womenyrɔ̃ wo le Petro ƒe sedede le Dɔwɔwɔwo 2:38 nu o, eyata wòfia wo bena woagbugbɔ wo nyrɔ̃ ɖe Aƒetɔ Yesu ƒe Ŋkɔ dzi. Azɔ, abe alesi wodo ŋugbe ene la, woxɔ Gbɔgbɔ Kɔkɔe.
Ekema ɖe, nukatae nusrɔ̃lawo nyrɔ̃ ame ɖe Yesu ƒe Ŋkɔ dzi, esime Yesu, ŋutɔ gblɔ na wo be woanyrɔ̃ ame le Fofo la, Vi la, kple Gbɔgbɔ Kɔkɔe la ƒe Ŋkɔa (“menye ŋkɔwo o”) me mahã? (Mateo 28:19) Ɖe woda voa? O! Wowɔ nusi wode asi na wo la pɛpɛpɛ.
Esime ègale nuŋɔŋlɔ sia xlẽm la, bu tame le wò ŋkɔ ŋu. Ɖe nènye via? Ke ɖe wò ŋkɔe nye, “Via”? Ɖe nènye Vidadaa? Wò ŋkɔe nye, “Vidadaa”? Edze ƒã be, mele me nenema o, emawo nye bubuŋkɔwo ko. Ŋkɔ ŋutɔŋutɔ le asiwò, eye nenema kee nye Mawu hã.
Ŋuɖoɖo la enye esi:
Naneke tɔgbe mele Biblia me nenema be wonyrɔ̃ ame ɖe Fofo la, Vi la, kple Gbɔgbɔ Kɔkɔe la ƒe ŋkɔ me o; elabena numa tɔgbea ɖeke meli o. Fofo menye ŋkɔ o; eye Vi menye ŋkɔ o; eye Gbɔgbɔ Kɔkɔe menye ŋkɔ o; ke boŋ Fofo la, Vi la, kple Gbɔgbɔ Kɔkɔe la ƒe Ŋkɔe nye Aƒetɔ Yesu Kristo.
Yesu Kristoe nye Mawu! Eyae nye Fofo la, Vi la, kple Gbɔgbɔ Kɔkɔe la.
Ne èle Gbɔgbɔ Kɔkɔe dim hele biabiam be nukaŋuti Aƒetɔ la mena ye vaseɖe fifi o la, ekema ate ŋu abia biabia ma ke si Paulo bia wo la ɖokuiwò bena, “Nuka dzie wonyrɔ̃ mi ɖo?”
Kpukpuiwo
Mateo 28:19
Miheyi ɖawɔ dukɔwo katã ne woanye nusrɔ̃lawo, mianyrɔ̃ woɖe Fofo la, kple Vi la, kpakple Gbɔgbɔ Kɔkɔe la ƒe ŋkɔa me:
[Ekae nye Fofo la ƒe Ŋkɔ? Vi la ƒe Ŋkɔ? Gbɔgbɔ Kɔkɔe la ƒe Ŋkɔ?]
Marko 16:16
Amesi ke xɔe se eye wonyrɔ̃e la woaxɔe ɖe agbe ke amesi ke mexɔe se o la woabu fɔe.
Yohanes 5:43
Nye la meva le Fofonye ƒe Ŋkɔ dzi, eye miele xɔyem o: ɖe ame bubu lava le ye ŋutɔ ƒe ŋkɔ dzi la, ne eya xɔ ge miala.
[Ne Eva le Fofoa ƒe Ŋkɔ me la, ekema Eƒe Ŋkɔ ɖe?]
Yohanes 10:30
Mía kple Fofonye la ɖekae míele.
Yohanes 12:45
Eye amesi le kpɔyem la ele amesi dɔm ɖa la kpɔm.
Yohanes 14:8-9
Filipo gblɔ nɛ bena, Aƒetɔ, fia Fofo la mí, eye aɖi kɔ na mí.
Yesu gblɔ nɛ bena, Filipo, ɤeyiɤi geɖe siawo menɔ anyi kpli mi, eye menyam o mahã? amesi ke kpɔm la ekpɔ Fofo la; eye aleke gblɔm nèle bena, Fia fofo la mí mahã?
Yohanes 20:27-28
Esia megbe la egblɔ na Toma bena, Do wò asibide ɖe afii, eye nakpɔ nye asiwo ɖa; eye do wò asi ɖa, eye naƒo ɖe nye axada me: eye megazu maxɔsetɔ, o ke boŋ xɔsetɔ.
Toma ɖo ŋu gblɔ nɛ bena, Nye Aƒetɔ kple nye Mawu.
Dɔwɔwɔwo 2:38-39
Eye Petro gblɔ na wo bena, Mitrɔ le miaƒe dzi me, eye mia dome amesiame nana woanyrɔ̃e ɖe Yesu Kristo ƒe Ŋkɔa dzi hena miaƒe nuvɔ̃wo ƒe keke, eye miaxɔ Gbɔgbɔ Kɔkɔe wòanye nunana.
Elabena mia kple mia viwo, kple amesiwo katã le adzɔge, kple ame geɖe alesi nu Aƒetɔ mía Mawu la ayɔ vɛ la, tɔe nye ŋugbedodo la.
Dɔwɔwɔwo 4:12
Eye menye ame bubua ɖeke me xɔxɔ la le o: elabena ŋkɔ bubua ɖeke mele dziƒoa te si wona amegbetɔwo, le esi me wòle be míakpɔ xɔxɔ la le o.
Dɔwɔwɔwo 8:12
Eye esi woxɔ Filipo amesi le Mawu fiaɖuƒe la, kple Yesu Kristo ƒe ŋkɔ ŋuti nyanyuie gblɔm la dzi se la, wonyrɔ̃ wo, ŋutsuwo kple nyɔnuwo siaa.
Dɔwɔwɔwo 19:3-6
Eye wògblɔ bena, Nuka dzi wonyrɔ̃ mi ɖo? Eye wogblɔ bena, Ɖe Yohanes ƒe amenyɔnyrɔ̃ la dzi.
Tete Paulo gblɔ be, Yohanes nyrɔ̃ ame kple dzimetɔtrɔ ƒe amenyɔnyrɔ̃, hegblɔ na dukɔ la bena, woaxɔ amesi gbɔna le eyome la dzi ase, eyae nye, Yesu.
Ke esi wose esia la, wonyrɔ̃ wo ɖe Aƒetɔ Yesu ƒe ŋkɔ dzi.
Eye esi Paulo da asi ɖe wo dzi la Gbɔgbɔ Kɔkɔe la va wo dzi; eye woƒo nu kple aɖe yeyewo, eye wogblɔ nya ɖi.
Efesotɔwo 4:5
Aƒetɔ ɖeka, xɔse ɖeka, nyɔnyrɔ̃ ɖeka,
Kolosetɔwo 3:17
Eye nusianu si miewɔna le nuƒoƒo alo dɔwɔwɔ me la, miwɔ ye katã le Kristo Yesu ƒe ŋkɔa dzi, eye mida akpe na Mawu fofo la le eyama me.
I Yohanes 5:7
Elabena ame etɔ̃e li amesiwo le ɖase ɖim le dziƒo, Fofo la, Nya la, kple Gbɔgbɔ Kɔkɔe la: eye ame etɔ̃ siawo le ɖeka.